اليوم صار عندي ١٠٠٠ فريند، أغلبن ما بعرفن بشكل شخصي، و يمكن ما أعرفن أبداً.
حبيت اعطين نبذه عن حالي، مشان ما كون بالنسبه ألن نكره.
سامحوني امانه … أول مره بسب، حبيت اكتب يلي بحسو بدون فلتره ولو لمره!
——————————————————————————————
ديمه بكل بساطه
==========
*سورية الهوى والجنسيه ، اماراتيه المولد، باهاماسيه العمل، وكنديه الإقامه.
*عشت ١٥ سنه من عمري بسوريا، و١٧ سنه برا ” مزبووط عمري ٣٢ سنه “
بس روحي معلقه بسوريا……… سورية بالنسبه ألي بتعني الأحبه والذكريات،
!بتعني البشر، ما بتعني لا الأرض و لا الحجر “إلا يلي فيه ذكريات” ما رح أكذب
*اكتشفت بعد الثوره أني جاهله كتير، قبل الثوره كنت مفكره حالي فهمانه
تخيلوا أني كنت من جماعه بشار قلبوا طيب لبشار … ههههه p:
*ما بحب الطائفيه بنوب، لا ما تقدم منها ولا ما تأخر، بترفعلي ضغطي .!.
*بالمختصر يلعن رب الطائفيه ……… ولا حدا يقلي عم تكفري …… الطائفيه لا رب لها!!
* معارضه حتى النخاع ومع الثوره، بس يلعن رب كتيبه النصره وحيا على الجهاد ومن لف لفها ورضي عنها.
كمان مره، لا تستغفرو ربكن وتقلولي حرام الكفر …….. قلنالكن الطائفيه لاااا رب لها!!
*صحي نسيت قلكن، أنا علمانيه أخونجيه ….. لا تسألوني كيف …. هيك قالتلي وحده من الأخوه الشبيحه 🙂
بس يمكن معها حق، يعني أنا ما بشرب كحول، ولا بحب الصور العريانه، يعني بينشك فيني برياحه ههههه.
* بدافع عن حريه اللاعلمانين أكتر من العلمانين …. لا تواخذونا، هيك فهمي للعلمانيه.
* ما بفهم بالسياسه، الله ياخد يللي غرقنا بالجهل، بس بحاول جاهده أني أفهم ……
هالكه جوزي اسئله ويمكن يستقيل مشان يتفرغ لأسئلتي الامنتهيه.
وعندي كمان رفيقين قراب بيفهموا هالكتن اسئله، واحد موالي،و واحد معارض.
الموالي حلقلي لأنو أفكاري ما عم تعجبوا ولا أفكارو عم تعجبني، بطلنا نحكي سياسه.
المعارض يكتر خيرو لساتو متحملني بس يمكن رح يطلع من تيابو من وراي والله أعلم 🙁
في ٨ أشخاص أدمنت كتاباتن بفيق الصبح أول شي بفتح صفحتن، ومنن تامر زكريا و صفحه بروزر أرجوك ههههه.
*انتمي للطبقه الكادحه، يعني بفيق كل يوم الساعه خمسه صباحاً، و ببلش ٦ .. حلمي بشغل فيق فيه الساعه ٧ !!
كمان لا تفهموني غلط بحب شغلي الحمدلله، بس يعني لازم نق شوي بحكم الجنسيه 🙂
ولا تقلولي السورين ما بينقو؟؟ بزعل منكن ها 🙂
*شغلتين تاعبيني بحياتي، ضمير صاحي زياده، ومعلاق كبير، حافظت عليه رغم طول سنين الإغتراب …….. بنت أصول يعني 🙂
*محسوبه على كتائب المنظرين، بس بوعدكن مرتبط بعمل مو بس حكي، لا تسألوني شو ما رح قلكن، بس وحياه الله سلميه.
* أعز أربع أصدقاء عندي من أكثر من ١٥ سنه موالين، تنين منن حلقولي بعد ما خرجت من قطيع بشار قلبو طيب
وضلوا تنين، متمسكه فين بإيدي وسناني، بس مشان ما يزحطو لأنو بعشقن …. 🙁
*صار عندي ميت رفيق ورفيقه بدل الصديقتين يلي حلقولي، مشكلين، موالين و معارضين ورمادين
بس ناس بالأغلب انسانيه جداً، عندا تقبل وبتعرف تفصل منيح بين حريه الرأي و التوجه، وبين العلاقات الإنسانيه.
بالمختصر متقبله الكل، مشان يتقبلوني، هي الحريه البدي اياها.
*كنت خاف ضيف ناس ما بعرفن بركي أكلوني؟؟ بعدين استوعبت أني ما بتاكل يعني انو ما آكل كم بحالي كتير.
*إلي سبع سنين على الفايسبوك ولا مره فتحت الشات، ولا ناويه افتحوا، يلي بيهمني الحديث معن ببعتلن مسج،
ويلي ما بيهمني حتى لو بعتولي ما برد، يعني ما بحب آخد وأعطي مع ناس ما بعرفن.
*عندي قائمتين، قائمه اسمها محظور، وقائمه أسمها مسموح.
المسموح عليها كلشي بكتبو، والمحظور عليها بس الحكم والصور وشعر السوركه والشنكليش الخاص فيني.
أيه أيه .. سوركه وشنكليش 🙂
بس يا أخي تركوني عبر عن حالي .. شيه…. مو هي الحريه البدكن اياها ؟؟
*رجاء خاص يلي عم يقرا كلامي هاد معناها موجود على قامه المسموح .. إذا حدا مزعوج من كتاباتي يبعتلي رساله،
وبيسعدني حطوا على قائمه السوركه والشنكليش 🙂
ويلي مو حابب التنين ليش لسا عم تقرا يا زلمه ؟؟ شيلني من عندك فوراً، صحتكم النفسيه تهمنا 🙂
* ما رح أندبلكن ساعه عن أحاسيسي على الوضع ببلدنا، والناس يلي عم تتشرد وتموت وتعتقل وتخسر بيوتا وسنين عمرا.
كلمه حارقينلي قلبي قليل على يلي بحسو.
أقصى أحلامي بلد حر آمن ” و حبذا لو علماني” خالي من بيت الأسد، وجماعات الخلافه الإسلاميه.
وعليه أوقع
DAA – عن صفحة : Dima Akhras Afra
